مسرحية الأعدام للشاعر الوطني جميل وادي
كتبهازهلولة ، في 26 ديسمبر 2006 الساعة: 11:14 ص
مسرحية الأعدام
للشاعر الوطني جميل وادي
هتافات و دوي اصياح و الناس اتسائل
ها / ايوا /ها و شوكت تگرب الساعه و یوصل المیعاد
وشما گربت الساعه الصفوف اتگوم تتگارب
وتتسابگ الناس اتگول عدهه اطراد
غص الشارع ابناس التحب الموت
أو هوأعهم حیارا ا للعبة الأو غاد
لعابي اتگول لا حس لا ضمیر
اگلوبهم چنهه صخو ر الواد
ما عدهم حمیه و عافوا الوجدان
سود اوجوهم و مصخمات اسماد
عجیب الناس ترضه اتشاهد المظلوم
تتگطع انفاسه وما تمدله امداد
عجیب الناس تحضر رگصت المخنوگ
بحبال الجهاله و چنهه عدهه اعیاد
واحد گال /اجیت من الصبح خا طر اشوف الموت
ولثاني نسه من جیّته اشراد
و واحد صاح بیدي اخنگ ذول
حتی ارتاح لیلي و ما احس بسهاد
ولثا لث و الرابع ولخا مس ولسات
صاحوا فرد صیحه انرید موتة البایع الأبلاد
واجت مرأة تبيع وتشتري من السوگ
والصدفة خذتهه ابسربت الأعداد
گالت لیش ملتمین ، شالقصه اشیريد ایصیر
واحد گالها امتانین لمن تحضر الأولاد
هذا الیوم راح انشوف ذوله البا عوا الأو طا ن
ینعدمون بسم لله و حکم حکا منه الأمجاد
یمه اهما عرب سئلته بستغراب؟
اي نعم ياريتهم اكراد
چا شنهي الفرق و تعدّت من احذاه
اشو ذوله الجما عه امشکبنین احقاد؟
مدریهه اشلفا ها الناس
لیش اتحب تشو ف امعلگه الأجساد؟
لیش اتحب تعیش ابضیم و بحرمان
و تساعد جما عه اللبسونه احداد
لیش الضحک زیبگ طایر و یه الریح
و لیلیه الدموع اتغرّگ الأمخاد
لیش الیوع یفرس کلمن ایمر بي
ولشبعان ضایگ من چثیر الزاد
لیش اعله النعاوي اتبات الأحدیثات
و ادراق العب متروس صم ارماد
لیش الینتفض و یرید حگه ایعود
یرمونه ابتهم امریکي لو مو ساد
لیش ولیش لن تسمع چثیر اصیاح
ذوله اهما او صلوا یا باهم الجلاد
(مشهد الثاني) 2
خيعونه اليشوف اوجوهم
هل ساع واحد صاح و تدنه
دفعته الصفوف اورد ورا و
ما شاف والأقدام ركنه
كلهه اتريد تعرف يا هو المتهوم
حتى ابدمه تتحنه
چنهم یایین ایدورون الثار
متحز مین عل ضنه
واحد گال متورطین بل تفجیر
ولثاني ندب اي هما مو منه
و خزله من البسیج اتنادي للخفاش
وتشتر ابحچیهه الفا گد المعنه
عجب چنه الزمان اتراجع الچنگیز
و رماح التتر تتسافط ابصفنه
و شوفن دم ابو السجاد سال اردود
چه بسمه جماعه اتهدر ابدمنه
ینا دون الکریم و هما عنه ابعاد
الهي اشکبر حلمک خربط الصفنه
هذوله احفاد کسری و دینهم منسوخ
و لا عدهم رحم و افکارهم عفنه
تعاوؤو للقتال و لموا العمیان
عمیان البصیره الرافگوا ضدنه
لموا کل حقدهم و نتخوا للثا ر
ثار اجدادهم لساع ما فکنه
یریدون ابطشهم ما نشیل الرآس
ننسه اشما یدور و ندفن ابحگنه
سمونه و هابیین متخلفین
و زرعوا قنبلتهم تنتگ ابعبنه
قصدهم نحرگ اب بيدر تعبنه و نتلف المحصول
و نضفر صوط جلاد الأیه ایطگنه
قصدهم نبگه متطشرین
و ما نعرض ابریجه الیاي یا کلنه
و لعد هذا السبب سمونه متطرفین
خا طر ننکره بلناس و یگطعون چفه الراد ینصرنه
امس سمونه من صدام ، ومن راح ومشه صدام
تهمتنه الجديده امريكه التمدنه
يثرون الفتن خاطر تخاف الناس
و تضدنه الأمم من بابهه اتزحنه
***
(مشهد الثالث)3
صاح ابصوت عالي ا و كبّر المذياع
هذوله اليوم نعدمهم
شو فوهم یه ناس و هما المفجرین
ما عدهم رحم حتى أب أ قاربهم
هذوله اتحالفوا وي بوش ضد ایران
و بسم الله العظیم الیوم نأدبهم
نرید انراوي قدرتنه ولعد هذا السبب
هل یوم نعرضهم
هما اعترفوا ابکل شي
ما واحد جبرهم من رضه انفسهم
اهتدوا لله و رسوله و عا فوا الشیطان
و کلفنه البسیج اشویه یر شدهم
کلشی الچنه نکتب هما ایو قعون
مو طاعت امرنه اهوای تنفعهم
بسم لله ابتدینه و ما تعبنه اهواي
و کلشي الي قریته امسجل ابخطهم
و هسه احنه یه ناس اليوم مجتمعین
نجري احکام الله الصادر ابحگهم
/شا فتهم الناس/
اويوهم ماهي اعله گد الچان یو صفهم
واحد گال ذوله ایهال
الهي اشلون حال امهم
أشر گال ذاکه ایگارب العشرین
و لثاني اقل بسنین شخصهم
وبصف الحچه گال افتکر طلاب
من صف المدرسه الحرس جمعهم
اشوف اویوهم تمطر برائه و مستحه يا ناس
واظن هاي التهم اتناسب الذمهم
تتنادس الناس و شي تشاو ر شي
و شلة من البسيج اتصيح اعدمهم
وصعد عل مسرح الجلاد
ذب احبال موته ايريد يشنقهم
***
(المشهد الرابع)4
وذا صوت الضحيه اتعله بين الناس
موش احنه فعلنه الحرس فجرهم
هذا الياي يعدمنه و بعض من ساعدو ا اهناك
ذبحوا بل ضحايه و شربوا ابدمهم
احنه انريد حگنه ابلایه خوف انگول
وليكتل بريئ ومظلوم هو السبب من عدكم
هذوله الفجروا درب المحله و كتلوا الاطفال
اشوف اویوهم تتخاطف ابصفکم
انتم بل حدید اتواجهون الناس
کون ایموت کلمن راد یر فضکم
منطقکم عتیج وباید من اسنین
واتچوون فمه الراد یسئلكم
وكتكم منتهي و سبگتکم الاحداث
و متعدي ترا تاریخ مصرفکم
راح تلفلف الأیام کل آثارکم بهداي
وشوفنه عسیر احساب باچرکم
راح اتدوس هیبتکم شعوب ایران
و چفوف الیهال اتشگگ اصورکم
و جثثکم تضل امعلگه اعله التیل
ومخنوگین یه ا و غاد ابعما یمکم
وآخیرآ
رفعهم بستدة الجلاد
ولحد آخر نفس گطع منا فسهم
حسباله ازغرو ا من علگاهم فوگ
مايدري نجوم البل سمه ابصفهم
و عله اچتاف العدمهم خلوا الأقدام
وصارت جنة الفر دوس مسکنهم
جميل وادي
ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج | دوّن الإدراج
